Դիտեք Հ1 արբանյակայինով. շաբաթ օրը` 10:05 և 23:10, կիրակի 07:45 եւ 24:00 /// Смотрите по спутниковому каналу Армянского Общественного Телевидения : в субботу в 10:05 и 23:10, в воскресенье в 07:45 и 24:00 (UTC+04:00 Yerevan) /// Watch on Armenian Public Television satellite network: on Saturday at 10:05АМ & 11:10 PM, Sunday at 07:45 AM & 12:00 PM (UTC+04:00 Yerevan)

«Ո՞ւմ ենք համարում հայ ժողովրդի պարծանքն ու հպարտությունը, ճանաչո՞ւմ ենք, արդյոք, պատմության, արվեստի, մշակույթի, գիտության, ռազմարվեստի մեր փառապանծ այրերին։ Ի՞նչ գիտենք այն մարդկանց մասին, ում մասնավոր կենսագրությունը վերածվել ու դարձել է մեր պատմության և ինքնության անքակտելի մասը։»

Այս կարգախոսով է հոկտեմբերի 13-ից բացվել և գործում «ՄԵՆՔ ՀԱՅ ԵՆՔ» հեռուստանախագծի կայքէջը, որտեղ այցելուների առաջարկներով արդեն կազմվել է ազգանվեր գործունեությամբ աչքի ընկած կյանքից հեռացած հայ գործիչների անունները: Հոկտեմբերի 20-ին ավարտվեց «ՄԵՆՔ ՀԱՅ ԵՆՔ» հեռուստանախագծի առաջին փուլը, և մենք այժմ ունենք 128 ակնառու գործչից բաղկացած ցուցակ, որը տեղադրված է այստեղ:

Առաջին փուլի արդյունքները զարմացրեցին մեզ մի քանի շառավիղներով: Մի դեպքում տխրեցինք, տեսնելով, թե ինչպիսի մարդիկ են արժանացել նվազագույն քվեների կամ ընդհանրապես մնացել են հանրության ուշադրությունից դուրս:

Մյուս դեպքերում դա շատ ուրախալի զարմանք էր, երբ տեսանք քվեարկությանը մասնակցող մարդկանց քանակը և այցելությունների հաճախականությունը: Նույնչափ ուրախալի էր հակադարձ կապի միջոցով բազմաթիվ առաջարկներ անողների պատմության ճանաչությունը, կարծիքների համարձակությունը և նկատողությունների բովանդակությունը:

Առանձնապես նշենք հատկապես մեկ այցելուի` գործիչներին ըստ ոլորտների բաժանելու առաջարկը, որի հետ տեղ-տեղ կարող ենք համաձայնել, սակայն ինչ վերաբերում նրա «Մենք էլ ենք հայ» էլեկտրոնային կեղծանվանը, այն, պարզապես, հիանալի է:

Բրավո, շատ սրամիտ է, շնորհակալություն, բայց հիշեցնում ենք, որ ձիերին գետանցում չեն փոխում, և խաղի կանոնները պետք է պահպանել մինչև այդ խաղի վերջը: Իսկ հետո կխոսենք. մեր կայքէջը արդեն մշտապես ձեր տրամադրության տակ է:

Հարգելի այցելուներ

Անկախ մեր պատասխանների առկայությունից կամ բացակայությունից, հավատացնում ենք, որ ձեր բոլոր ուղերձները մանրազնին վերլուծվում են և հաշվի են առնվելու այս հեռուստանախագծին հաջորդող արդեն ծրագրվող այլ` նույն ձևաչափի նախագծերի մշակման ժամանակ:

Այդ մշակումներին կարող եք մասնակցել նաև դուք` այս կայքէջը գործելու է նաև այս նախագծի ավարտից հետո, և մեր հաղորդակցումը կարող է դառնալ շարունակական: Բայց դրա մասին հետո, իսկ այժմ փաստենք, որ «ՄԵՆՔ ՀԱՅ ԵՆՔ» հեռուստանախագիծը ընթանում է իր հունով և անցել է երկրորդ փուլ:

Երկրորդ փուլ

Հոկտեմբերի 20-ին 100 թեկանծուի փոխարեն ձևավորվեց 128 անունից կազմված ցուցակ, քանի որ առաջարկվում էին այնպիսի' գործիչների թեկնածություններ, որ մենք վերջնական ընտրության հարցը որոշեցինք թողնել ձեր հայեցողությանը:

Հոկտեմբերի 20-ից արդեն ընթանում է քվեարկությունը` եզրափակիչ փուլի 12 թեկնածուների ընտրության վերաբերյալ: Համացանցում դուք կարող եք հետևել գործընթացի զարգացմանը և օրական 12 անգամ քվեարկել ձեր նախընտրած գործչի/գործիչների օգտին: Այստեղ, մեր կայքէջում տրված է նաև այցելուների SMS քվեարկության կարճ հեռախոսահամարը, որի միջոցով դուք կարող եք կրկնապատկել ձեր ազդեցությունը քվեարկության արդյունքի վրա:

Երկրորդ փուլը տևելու է մինչև նոյեմբերի 20-ը, ինչից հետո արդյունքները կամփոփվեն, և նոյեմբերի 26-ին կայքէջում կտեղադրվի 12` եզրափակիչ փուլ անցած գործիչների անունները:

Երրորդ` հեռուստատեսային փուլ

Առավելագույն քվեներ ստացած 12 թեկնածուի շուրջ կսկսվեն հեռուստատեսային քննարկումներ։ Այս փուլը բաղկացած է 13 հաղորդումից։

Հաղորդումները վարելու է Արթուր Բախտամյանը։

Դեկտեմբերի 3-ին, իսկ հետագայում յուրաքանչյուր հինգշաբթի, ժամը 22-00-ին ՀԱՅ TV-ի նոր տաղավարից եթեր կհեռարձակվի մեկնարկային հաղորդումը՝ 12 մասնագետ-խոսնակների մասնակցությամբ։

Յուրաքանչյուր հաղորդում նվիրված է լինելու 12 ընտրված գործիչներից մեկին, ում ներկայացնելու է համապատասխան խոսնակը։

Նախագիծը կհեռարձակվի նաև Հանրային Համահայկական /արբայնակային/ ալիքով:

Մասնակից փորձագետները և լսարանը իրավունք ունի բանավիճելու հիմնական խոսնակի հետ, քանի որ միշտ չէ, որ անցյալին վերաբերող գնահատականները համընկնում են։ Բացի դրանից կցուցադրվի վավերագրական տեսաֆիլմ` տվյալ օրվա հերոսի մասին։ Հաջորդ 11 հինգշաբթիների ընթացքում հեռուստադիտողին նույն ձևաչափով կներկայցվեն մնացյալ 11 գործիչների կենսագրություններն ու անցած ուղին։

Հեռուստատեսային փուլի սկզբից, դեկտեմբերի 3-ից սկսվելու և մինչև 12-րդ հաղորդման ավարտը շարունակվելու է քվեակությունը, բայց արդեն փոփոխված ծավալով: Կարելի է քվեարկել նախընտրած գործչի օգտին օրական միայն մեկ անգամ:

Եզրափակիչ՝ 13-րդ հաղորդման ժամանակ խոսնակները կվերլուծեն և կամփոփեն հանրային քննարկումների, համացանցային և SMS քվեարկության արդյունքները, ինչից հետո կհրապարակվի ամենամեծ ժողովրդականություն վայելող գործչի անունը։

Այս պահից «Մենք» և «Հայ» հասկացությունները բնորոշողը Դուք եք։ Մասնակցեք և ներգրավեք ձեր մտերիմներին, օգտվեք հասարակական կարծիք և ազգային արժեհամակարգ ձևավորելու ձեր իրավունքից։